يازوع قلبى زوعة الحر لى زاع =من راس ملموم يداوى وجوعها
مرب قرناس على الصيد طلاع =كفوفة لمنة هد دميت شلوعها
ومرب هاجوس على القلب رثاع = يقبل على قلبى ويدعى جموعها
طب لمن قلبة رمع فية رماع = وطب لمن نفسة هجوسة تروعها
أخيل من راسة سنا نوض لماع = مزن يبشر فى الصحارى رتوعها
مزن يسوقة من هوا الغرب دفاع = وأسقا نبات يابسات جذوعها
تضحك مقاديمة وتالية دماع = وأرخت على خد البسيطة دموعها
ياما حلا عقب المطر ريحة القاع = وياما حلا سج القدم فى ربوعها
وشوف النبات اللى حوا كل الأنواع = وشوف الزهور اللى تعلت فروعها
وشوف البدو كل(ن) ورا الذود تباع = لمراحها يازين حزه رجوعها
حليبها ينبيك مع كل قرطاع = ينبيك عن عشب رعت به شبوعها
عشب زماليقة لها فيه مرباع = تشبع به الخلفة ويسمن تبوعها
والله ما أغبط اللى ورا المال جماع = لاسجت رجلى بين فايح قشوعها
وبيت الشعر قدره مع الوقت ماضاع = ولاضاع قدر اللى تصفط شروعها
والنار شبت والحطب فوقها شاع = سلمن لقوم ماتغير طبوعها
والنجر ياتيلة مع الدق لعلاع = صوتة تراحيب تحيى سموعها
ومهيلات البن والتمر مقداع = طب(ن) لروس ما تداوا صدوعها
وسوالف يطرب لها كل سماع = لاوردت ماهى تضيع سنوعها
والله ماألوم اللى ورا البرق تباع = ولاألوم بدو(ن) فى البداوه ولوعها
أهل النفوس اللى على الطيب تنداع = وساع الصدور اللى بعاد نجوعها
هاذى علوم الطيب شارى وبياع = ومن يزرع أرض الطيب يقطف جنوعها
وزرع سقاه الحقد بيدين زراع = لابد ماتحصد أدينة زروعها
الطيب مكسب والهدف صيد الأنصاع = ولاكل من يرمى يثبت وقوعها
والذيب نابة من قسا الوقت مزاع = وإن جاع جر الصوت باأعلى رفوعها
ولاهو بعيب الذيب يعوى لما جاع = سباع الخلا تفرس ولوطال جوعها
الله من هم لجا بين الأضلاع = ومن علة بين الضماير رموعها
تبداعلى اللى يحفظ السد ماذاع = وتخفى على اللى لادراها يذوعها
عليك تبدا يافهد وأنت فزاع = ضاقت على ياأخوك خالى وسوعها
يامزبن اللى من بلا الوقت مرتاع = ياعزوتى لى جات وقفت فزوعها
يا أبن الكريم اللى مع الجود له باع = خطل اليدين اللى طوال ذروعها
أبغاك يازبن المشافيق فراع = من هاجس فى الليل حزه هجوعها
يسهر عيونى والمخاليق هجاع = والنفس يامشكاى دايم يلوعها
عوص المشاكل مالها غير صعصاع = هاذيك يعسفها وألاخرى يصوعها
عليك ياربى تعاديل الأوضاع = ونفسى لماقدرت تعلن خضوعها
تمت وصلوا كل ماهب ذعذاع = على نبي (ن) فى القيامة شفوعها